MINNETTE NIEUWOUDT
Is jy kunssinnig? Dra jy skoene? As jy “ja” geantwoord het, is die Converse Optimistic Rebels-beweging vir jou bedoel!
Die Converse Optimistic Rebels filmfees is ‘n kompetisie wat deur All Stars, die legendariese skoenvervaardigers aangebied word. Die kompetisie het reeds in Junie 2010 afgeskop en is goed op dreef. Volgens die kompetisie se webtuiste (www.optimisticrebels.co.za) is hulle opsoek na kreatiewe jongmense wat uitblink in hul gekose media.
Om in te skryf moet jy eers op bogenoemde webtuiste registreer. Daarna moet jy jou videokamera afstof en `n kortvideo, wat jou kuns ten toon stel, beplan. Op die webtuiste is daar voorbeelde van inspirerende videos wat deur die Converse Brand Ambassadors gemaak is. Die video met die meeste stemme in elke kategorie gaan met prysgeld van R40 000 en `n Converse geskenkpak van R5000 wegstap. Die wenner staan ook `n kans om ‘n Converse Brand ambassador te word.
Inskrywings kan in enige van vyf kategorië gemaak word. Die kunskategorie is vir enige visuele kuns van skilder tot graffiti, fotografie tot stokmannetjies teken en natuurlik alles tussenin. As jy eerder met jou hele liggaam jou kuns beoefen is die musiek- en danskategorie waarskynlik meer in jou kraal. Diegene wat `n staaltjie kan vertel sodat mense lê soos hulle lag kan hul geluk in die komediekategorie probeer. Die lewenskategorie is vir mense wat graag `n verskil wil maak. Of jy rommel hersirkuleer of blinde kinders leer skilder, die Moeder Theresas onder ons moet in hierdie kategorie inskryf. Die laaste kategorie, leer, is vir mense wat innoverend kan dink. Die ingenieurs, die wetenskaplikes en die aktuarisse kry hier geleentheid om ook hul vermoëns ten toon te stel. Hoe `n mens ‘n wetenskaplike formule in die formaat van `n video aanbied sodat ander jongmense daarvoor gaan stem, weet Perdeby nie, maar dis seker waar die innovasie inkom.
As jy op hierdie punt dink, “Dis alles goed en wel, maar ek is nie lus om so baie geld te wen deur in te skryf nie, ek wil net partytjie hou” ,kan jy een van die vele Converse Optimistic Rebels partytjies en geleenthede bywoon. Daar was reeds `n geleentheid om unieke kuns op jou All Stars te laat teken, sowel as `n enorme All Star waarop jy jou eie boodskappie kon skryf. Die volgende kuns-opskop in Pretoria vind op 21 Oktober om 17:30 tot 22:00 in Hatfield Square plaas.
Image: optimisticrebels.co.za
